月光望友

今夜月光暝

月娘光光佇天頂

照落岸邊的海湧

一湧閣一湧

引我思念想起你

徛佇海峽的這爿

彼時蹛佇北部食頭路

你是組長我辛勞

種花種樹兼挖土

實在是誠辛苦

佳哉有你用心來看顧

菜鳥仔才漸漸綴會著跤步

這是你的功勞

曾經相招 雪山

徛佇嶺頂向前看

你的眼神是遐爾仔深沉

曾經開車去白河

跍佇田邊翕荷花

你的姿勢若坐佇荷花頂

這馬你已經出家去修行

流浪到海峽的彼爿

山頂寒冷

你敢有適應

打坐念經

你敢會有閒

有閒想起海峽的這爿

故鄉的親人共好友

佇這個月光的十五暝◇