詩的感覺

若無詩的感覺

日子干焦是無閒，上班共下班

一切大自然的美景，只不過是

車窗外，目一的景緻

何時會當發覺

每工日出日落的無仝

清新悅耳的鳥啼

青翠的樹葉

美麗的花蕊

透早日頭光照落的大埕

何時會當發覺

厝外美妙的光景

若無詩的感覺

若無徙動的跤步

親像貓的輕巧，閣親像

雄雄著驚的粉鳥，所搧動翼股的響聲

無這種的敏感

就無法度，走揣詩的感覺

所以，詩的感覺

毋是覕佇厝內戇戇想

是入去山林，感受樹木的清芳

是行向海邊，感受海風的清涼

彼是一種全身的體會

親像詩彼一般

全然的感受