今夜的清靜

今仔日終於好天囉

這陣才感覺著日頭誠好

會當拚掃樓頂的積水

會當騎車四界踅

會當曝著這个生菇的身軀

上好的是，會當予耳空清靜

予目睭歇睏

減少不斷播送的風颱災情

佮不斷起落的心情

下暗，也就是拄才

去公所前的廣場散步

暗時的天頂誠烏

干焦幾粒星咧閃爍

周圍的田園傳來

水雞仔大大聲佇咧叫

風微微仔吹來

皮膚感覺有淡薄仔涼意

秋天是真正來囉

有一點仔清新，涼爽的海風

佇狂風暴雨過了後的今夜

若親像是一種幸運的享受

佇這个變化莫測的氣候

佮人生仝款

所會當把握的，就是今夜的清靜