讀冊命

透早袂光就起床

衫褲穿好食早頓

坐佇牛車欲去園

搖搖巔巔真愛睏

今日番薯園欲收成

阿母仔叫阮就愛來鬥跤手

誰人叫阮一直想欲讀冊

賣番薯通好繳註冊錢

抾番薯真沉重

日頭出來曝死人

覕佇樹跤欲歇睏

連鞭予人喝來繼續抾

這種粗重的穡頭做規工

阮的耐性敢會堪

一睏仔閣走佮無看人

原來藏佇圳溝咧納涼

藏一睏無人揣

感覺嘛誠歹謝

只好頭犁犁

綴著阿母仔後壁踅

日頭將近欲落西

頭前阿母仔的衫褲是烏甲澹

跤步愈來愈沉重

捀著畚箕是誠艱難

阿母仔講

收成一牛車

汝的冊錢毋免驚

原來毋是阮有讀冊命

是有人趁錢肯拍拚